Izraeli vijon bombardimet intensive ajrore në pjesën jugore të Rripit të Gazës, ku priten ilaçe për pengjet në duart e Hamasit dhe ndihma humanitare për popullsinë palestineze, si pjesë e një marrëveshjeje të lidhur me ndërmjetësimin e Katar dhe Francë.

Pas mesnate, dëshmitarët raportuan sulme izraelite pranë spitalit Nasser në Khan Younis, qyteti më i madh në Rripin jugor të Gazës, një zonë ku ushtria izraelite thotë se krerët e lëvizjes islamike palestineze Hamas janë fshehur.

Sipas dëshmitarëve okularë, granatimet shkaktuan panik dhe ikjen e të zhvendosurve nga luftimet, të cilët ishin strehuar në oborrin e madh të institucionit shëndetësor javët e fundit.

Ministria e shëndetësisë e Hamasit tha se kishte pasur një “numër të madh” viktimash, të paktën 81 të vdekur, në bombardimet gjatë natës në Khan Younis dhe zona të tjera të enklavës.

I zhytur në një situatë humanitare të cilësuar si “katastrofike”, Rripi i Gazës po përballet me një “rrezik uria” dhe një krizë të shëndetit publik, në mes të dimrit dhe një valë të ftohtë, OKB-ja nuk ndalet së paralajmëruari.

“Vajza ime nuk mund të flejë, vazhdon të më thotë se ka ftohtë, e sheh që po flemë poshtë, nuk kam me çfarë të mbuloj. Nuk mund ta përshkruaj sa ftohtë është këtu. Do të vdesim nga i ftohti jashtë?”, tha Hanin Antoine, e zhvendosur në Rafah, në skajin jugor të enklavës palestineze, në kufirin me Egjiptin.

Në të njëjtën kohë Rripi i Gazës po përjeton ndërprerjen “më të gjatë” të telekomunikacionit “që nga shpërthimi i luftës”.

Megjithëse përpjekjet për të shpallur një “armëpushim”, apo edhe një armëpushim të dytë humanitar si ai në fund të nëntorit, dështojnë, ndërmjetësimi i Francës dhe Katarit pritet të lejojë dërgimin në orët e ardhshme të ndihmave humanitare të destinuara për civilët palestinezë dhe ilaçet për pengjet.
/abcnews.al